Ukrayina Milliy telükesizlik ve mudafaa şurasınıñ kâtibi Rustem Umerov prezident Volodımır Zelenskıynen Ukrayina eyyetiniñ Amerika Birleşken Devletlerindeki iş neticelerini telefonda laf etti. Bu aqta o, dekabrniñ 1-nde bildirdi.
"ABDde eki pek semereli kün içinde çoq saat körüşüv ve muzakere oldı. Bayağı ilerilev kördik, amma ayrı meseleler daa çalışılmalı", – dep bildirdi Umerov.
Ukrayina Milliy telükesizlik ve mudafaa şurasınıñ kâtibi Amerika tarafına konstruktiv ve ortaq yanaşuvı içün teşekkürler bildirdi. Onıñ aytqanına köre, körüşüv iştirakçileri muzakere esnasını devam ettirmek içün bağda qalmağa añlaştı.
"Tolu maruza azırlap, eñ yaqın vaqıtta onı Prezidentke endi muzakere gruppamıznen yol çıqılğan Avropadaki körüşüv vaqtında şahsen taqdim etecekmiz. Ukrayina içün barışıq yolunda çalışmağa devam etemiz", – dep qoştı o.
Prezident Volodımır Zelenskıy Ukrayina eyyetiniñ Amerika tarafınen Floridadaki muzakerelerini Avropa memleketleriniñ liderleri, Avropa Birliginiñ reberligi ve NATO baş kâtibinen muzakere etti, dep bildirgen edi:
"Cenkni itibarlı bir şekilde bitirmek kerek, dep aynı fikirdemiz. Telükesizlik kefaletleri ve em Ukrayina, em Avropa içün turğunlığımıznıñ uzun müddetli temelinde ilerilevniñ olması müim".
ABD prezidentiniñ mahsus vekili Steve Witkoff dekabrniñ 1-nde Rusiye Federatsiyasınıñ lideri Vladimir Putinnen körüşmek içün Moskvağa yol aldı. Witkoff Putinge noyabrniñ 30-nda Floridanıñ Hallandale şeerinde ötkerilgen Ukrayina-Amerika muzakereleriniñ neticeleri aqqında tarif etecek.
Amerika eyyetiniñ yolbaşçısı olğan ABD devlet kâtibi Marco Rubio körüşüvni "pek semereli" dep adlandırıp, "daa çoq iş kerek", dep qayd etti.
Rubio barışıq añlaşmasınıñ parametrlerini belgilemek içün ABD prezidentiniñ mahsus vekili Steve Witkoff Rusiye prezidenti Vladimir Putinnen muzakereler içün Moskvanı ziyaret etecek, dep tasdıqladı.
