Rusiye Federatsiyasınıñ prezidenti Vladimir Putin Moskva Avropanen cenkleşmege istemey, amma Avropa cenk başlatsa – Rusiye "şimdi bile azır", dep bildirdi.
"Rusiye Avropa memleketlerinen cenkleşmege istemey, amma Avropa biznen cenkleşmege istese ve başlasa – biz şimdi bile azırmız, bir şübhe yoq. Avropa biznen cenkleşmege başlasa, bu pek tez olur, dep tüşünem. Bu Ukrayina degil de. Ukrayinanen biz cerrahi usulnen, muqayt olıp areket etemiz. Bu sözniñ zemaneviy manasında bir cenk degil", – dedi o.
Putinniñ aytqanına köre, Avropa cenk başlatsa, "añlaşa bilecegimiz biri olmaycaq bir vaziyet tez peyda ola bile".
Bu aqta Rusiye prezidenti ABD mahsus vekili Steve Witkoff ile Ukrayinağa qarşı muzakereler arfesinde ayttı.
Rusiye 2022 senesi fevral ayından berli Ukrayinağa qarşı büyük cenk başlattı. Bu sene sentâbr ayında NATO memleketleri Rusiyeni bir qaç kere ava boşluğını bozğanında qabaatladı. Moskva bunı inkâr ete.
Avropa komissiyasınıñ prezidenti Ursula Gertrud von der Leyen AB ava boşluğınıñ bir çoq sefer bozulması Avropanıñ birligini bozmaq ve Ukrayinağa yardımnı zayıflatmaq içün ardı-sıra kampaniya ola, dep bildirdi.